Аляксандр Рубец – расійскі мастак беларускага паходжання, прадстаўнік рускай і савецкай мастацкай школы канца 1960 – 1970-х гадоў, працуе ў жанры пейзажа, нацюрморта, партрэта. На выставе творчасць Аляксандра Рубца прадстаўлена двума жанрамі: пейзажам і нацюрмортам. Усе творы напісаны за апошнія 12 гадоў актыўнай работы майстра ў тэхніцы алейнага жывапісу.
Аляксандр Рубец – пастаянны ўдзельнік акадэмічных выстаў Паўднёвага аддзялення Расійскай акадэміі мастацтваў. У 2014 г. адбылася персанальная выстава твораў Аляксандра Рубца ў Расійскай акадэміі мастацтваў. Работы Аляксандра Рубца знаходзяцца больш як у дваццаці мастацкіх музеях Расійскай Федэрацыі і Рэспублікі Беларусь.
З 2013 г. Аляксандр Рубец – Ганаровы член Расійскай акадэміі мастацтваў, з 2023 г. – член-карэспандэнт Расійскай акадэміі мастацтваў. Узнагароджаны залатым і сярэбранымі медалямі Расійскай акадэміі мастацтваў, медалём “Шувалаў” Расійскай акадэміі мастацтваў, медалём “За заслугі перад Акадэміяй РАМ”.
Творчасць Аляксандра Рубца надзелена якасцю крос-культурнай успрымальнасці. У яго атмасферных палотнах з асаблівай размашыстай хадой пэндзля, наўмысна ці несвядома пераплятаюцца рысы некалькіх культурных традыцый. Яны адлюстроўваюць ідэю касмапалітызму мастацтва, яго аб'яднаўчай сілы, якая змывае межы паміж культурамі і нацыямі, збліжаючы людзей на аснове агульных чалавечых каштоўнасцяў і эмоцый.
Краявіды мастака – гэта своеасаблівая рэалізацыя яго ўяўленняў аб свеце, жаданне перадаць устойлівасць і веліч прыроды Каўказа, якія б змены ў ёй не адбываліся. Кожны з прадстаўленых на выставе краявідаў адрозніваецца арганічнай прыгажосцю каляровых сугуччаў, маляўнічай архітэктонікай формы, рэльефнай фактурнасцю, шырынёй дыхання, прастатой і выразнасцю творчай думкі, якая заўсёды знаходзіць яснае і пластычнае выказванне ў прадстаўленай натуры. Нацюрморты Аляксандра Рубца характарызуюцца асаблівым бачаннем натуры, якое знаходзіць пластычнае выказванне ў самой тканіне мастацкага твора. У краявідах і нацюрмортах Аляксандра Рубца матэрыя, ажыўленая колерам і дынамічным мазком, раскрывае паэзію фізічнага матэрыяльнага быцця прыроды Каўказа і свету рэчаў чалавека, прымушае яе трапятаць пачуццёвай рэчыўнасцю. Мастак здолеў стварыць сваю ўласную жывапісную прастору, якая існуе ў асаблівым вымярэнні, дзе пануюць колер, форма і пачуццё.
На выставе прадстаўлена больш за 50 палотнаў, якія па-рознаму адлюстроўваюць творчае бачанне і ўспрыманне прыроды і культуры Каўказа аўтарам.
Аснову экспазіцый складуць творы з калекцыі аўтара. Выстава “Каўказу... Аляксандр Рубец. Жывапіс” будзе экспанавацца з 28 лютага па 13 красавіка 2025 года ў галоўным будынку музея (Леніна, 20; вялікая галерэя).
Куратары выставы – Ганна Уладзіміраўна Кузняцова, старшы навуковы супрацоўнік аддзела замежнага мастацтва Нацыянальнага мастацкага музея Рэспублікі Беларусь; Галіна Георгіеўна Цыдзік, малодшы навуковы супрацоўнік аддзела замежнага мастацтва Нацыянальнага мастацкага музея Рэспублікі Беларусь.
