Павел Хадаровіч працуе ў розных жанрах, але перавагу аддае нацюрморту. Карціны, напісаныя ў гэтым жанры, вызначаюцца строгай, старанна прапрацаванай кампазіцыяй, устойлівымі, рытмічна выпісанымі формамі і дакладна перададзенай фактурнасцю прадметаў, нечаканасцю ракурсаў, якія надае статычнай, як здаецца, кампазіцыі дынаміку і метафарычнасць. Трэба адзначыць і каларыстычныя рашэнні жывапісца: колеравая гама разнастайная, але колеры някідкія, як бы “аксамітныя”, яны не адцягваюць на сябе ўвагу і працуюць на агульную задуму твора.
Акрамя нацюрмортаў, на выставе прадстаўлены таксама некалькі пейзажаў. Пейзажам П. Хадаровіча ўласцівая паэтычная настроенасць у спалучэнні з вонкавай эмацыянальнай стрыманасцю, глыбока асабістыя адносіны да прыроднага свету, якія не пакідаюць гледача абыякавым.
Павел Уладзіміравіч Хадаровіч нарадзіўся 25 чэрвеня 1987 года ў Мінску ў сям’і вядомага мастака Уладзіміра Паўлавіча Хадаровіча. У 2006 годзе скончыў гімназію-каледж мастацтваў імя І.В. Ахрэмчыка па спецыяльнасці “жывапіс”. У 2012 годзе скончыў Беларускую дзяржаўную акадэмію мастацтваў па спецыяльнасці “станковы жывапіс”, абараніўшы з найвышэйшым балам дыпломны праект “З рукатворных крыніц”.
З 2012 па 2014 год Павел Хадаровіч працаваў выкладчыкам малюнка і жывапісу ў Мінскім дзяржаўным мастацкім каледжы імя А.К. Глебава. У 2015 годзе заснаваў у Мінску ўласную школу-студыю жывапісу “Квадарт”. На базе студыі арганізаваў і правёў шэраг арт-праектаў.
З 2013 года П. Хадаровіч – член Беларускага саюза мастакоў.
З 2007 года актыўна ўдзельнічае ў розных выставах, конкурсах і праектах. Сярод іх – персанальныя выставы “Вытокі натхнення” (Слуцк, 2009), “Вяртанне да вытокаў” (Светлагорск, 2014), “Берлін вачыма беларускага мастака” ў пасольстве Рэспублікі Беларусь у Берліне (2014), выставы ў галерэях “Каляровы шлях” у Оршы (2017) і ArtBlique ў Мінску (2018). Мастак прымаў удзел у многіх групавых, рэспубліканскіх і міжнародных выставах, якія праходзілі ў Мінску, Віцебску, Міры, а таксама за межамі Рэспублікі Беларусь – у Польшчы і Літве.
