Майстры Лінагравюры

Майстры Лінагравюры

Нацыянальны мастацкі музей Рэспублікі Беларусь Галоўны корпус

Выстава станковых эстампаў выдатных майстроў, чые работы выкананы не ў класічнай ксілаграфіі, а ў дастаткова новай тэхніцы лінагравюры – гэта выдатны спосаб пазнаёміць гледача з яшчэ адной часткай багатай калекцыі музея, магчымасць шырэй уявіць разнастайнасць тэхнік і матэрыялаў свету выяўленчага мастацтва.

У калекцыі Нацыянальнага мастацкага музея Рэспублікі Беларусь беражліва захоўваюцца сотні лінагравюр з розных краін. Сярод іх – як асобныя аркушы, серыі і альбомы, кніжныя ілюстрацыі, так і ўнікальны збор гравіраваных лінолеумных дошак. Для экспазіцыі выставы, якая ахоплівае некалькі дзесяцігоддзяў ХХ стагоддзя (1930–1980-я), адабраны каля 40 работ у жанрах відавай гравюры, нацюрморта, інтэр’ера і ў бытавым жанры майстроў беларускай школы графікі (А. М. Тычына, С. П. Герус, В. М. Ткачук, У. С. Садзін, Б. Б. Цітовіч, У. А. Правідохін і інш.), эстампы рускіх мастакоў (І. М. Паўлаў, В. С. Бібікаў, І. А. Сакалоў, У. А. Фаворскі, Э. Б. Бернштэйн, А. А. Дзмітрыеў, А. І. Іглін і інш.) і літоўскай школы гравюры (С. І. Разінас), а таксама лінолеумная дошка для друку і гравіравальныя інструменты. Некаторыя з графічных аркушаў экспануюцца ўпершыню. 

Выстава “Майстры лінагравюры” дае ўнікальную магчымасць гледачу атрымаць асалоду ад сапраўдных шэдэўраў лепшых мастакоў-графікаў.

Работа выставы працягнецца
 да 15 мая 2022 года