Дзяржаўны Рускі музей – першы ў Расіі і найбуйнейшы ў свеце дзяржаўны мастацкі музей нацыянальнага выяўленчага мастацтва. Калекцыя музея налічвае больш за 440 тысяч адзінак захоўвання і ахоплівае больш за 1000 гадоў развіцця расійскага мастацтва – ад перыяду дамангольскай Русі да актуальнага мастацтва XXI стагоддзя.
Рускі музей першым пачаў выкарыстоўваць у сваёй дзейнасці сучасныя інфармацыйныя тэхналогіі. Сёння прагуляцца па залах Рускага музея і наведаць яго часовыя выставы, назіраць за працай рэстаўратараў і наведваць музейныя заняткі можна не выходзячы з дому – тэхналогіі высокадакладнай здымкі, мультымедыя і AR/VR-тэхналогіі робяць даступнымі не толькі скарбніцу расійскага мастацтва, але і ўнікальныя музейныя веды.
Мабільная планшэтная выстаўка “Шэдэўры Рускага музея” ўключае 23 жывапісныя творы, створаныя рускімі майстрамі XIV–XX стагоддзяў, і знаёміць з асноўнымі этапамі развіцця рускага выяўленчага мастацтва. Гэта хрэстаматыйныя работы І. Вішнякова, Д. Лявіцкага, А. Кіпрэнскага, К. Брулова, А. Іванова, І. Айвазоўскага, В. Сурыкава, І. Рэпіна, А. Куінджы, П. Філонава, К. Пятрова-Водкіна, А. Дэйнекі і іншых.
Аснову выставы складае мультымедыя-гід у бясплатным мабільным дадатку дапоўненай рэальнасці “Artefact”. Пры навядзенні камеры смартфона на экспанат наведвальнікі выставы атрымліваюць дадатковую інфармацыю аб музейным экспанаце ў выглядзе “кропак цікавасці”, аўдыягіда, анатацыі, а таксама галерэі дадатковых выяў – падрыхтоўчых эскізаў або малюнкаў мастака, фатаграфій твораў у працэсе рэстаўрацыі. З дадатку карыстальнікі смартфонаў могуць перамясціцца ў залы Рускага музея і ўбачыць рэальныя памеры работ. Спецыяльна распрацаваны дызайн планшэтаў выставы падкрэслівае мастацкую выразнасць жывапісных твораў, не ўтвараючы эфекту рэпрадукцый і не ўпісваючы ў фармат планшэтаў рознамаштабныя і рознафарматныя работы.
Мабільная планшэтная выстава “Шэдэўры Рускага музея”, падрыхтаваная пры ўдзеле Прадстаўніцтва Россупрацоўніцтва ў Рэспубліцы Беларусь, з’яўляецца шматабяцальным пачаткам супрацоўніцтва паміж Нацыянальным мастацкім музеем Рэспублікі Беларусь і Дзяржаўным Рускім музеем, і адкрыецца ў залах Нацыянальнага мастацкага музея Рэспублікі Беларусь напярэдадні Дня яднання народаў Беларусі і Расіі.
Выстава будзе працаваць да 16 красавіка 2024 г.
Куратары выставы – Дарына Зуева і Елізавета Крывецкая, малодшыя навуковыя супрацоўнікі выставачнага аддзела Нацыянальнага мастацкага музея Рэспублікі Беларусь.
