Дзіцячы партрэт займае важнае месца ў еўрапейскай культуры. Асабліва адчувальна гэта стала ў першай палове XIX ст. з прыходам рамантызму. Партрэты ў гэтым напрамку раскрываюць дзяцей як важную частку грамадства і сям'і, асобы, якая нясе новы погляд на навакольны свет.
У далейшым дзіцячы партрэт увабраў у сябе дэмакратычнае паветра другой паловы XIX стагоддзя, прайшоўшы шлях ад лёгкасці і радасці юных гадоў да суровай праўды паўсядзённага жыцця. А галоўнымі крыніцамі натхнення мастакоў былі не шляхетныя дзеці, а з ніжэйшых саслоўяў. Яны і сталі праваднікамі ў рэаліі быцця.
Магчымасць супастаўлення розных пунктаў гледжання на асобу дзіцяці і тэму дзяцінства – галоўная вартасць выставы з фондаў Нацыянальнага мастацкага музея Рэспублікі Беларусь. Прадстаўленыя на ёй творы закліканы нагадаць гледачу, што дзіця ва ўсе часы – значны сімвал неперарыўнага быцця, а значыць, і вечнасці свету.
