Святлана Каткова – адна з выбітных мастачак Беларусі XX–XXI стст. Яе творчасць ахоплівае не адно дзесяцігоддзе, прадстаўляючы цэлую эпоху. Яна зараджалася ў рэчышчы савецкага мастацтва, але заўсёды насіла самабытны характар і мела шырокі ўплыў на фарміраванне беларускай мастацкай школы.
Выстава Святланы Катковай у Нацыянальным мастацкім музеі Рэспублікі Беларусь будзе самым маштабным паказам яе работ і ахопіць усе перыяды творчасці мастачкі, пачынаючы з канца 1960-х і заканчваючы працамі, створанымі ў апошні год жыцця. На выставе будуць экспанавацца творы са збору Нацыянальнага мастацкага музея Рэспублікі Беларусь, фондаў Беларускага саюза мастакоў, калекцыі сям’і мастачкі.
Творы знаходзяцца ў Нацыянальным мастацкім музеі Рэспублікі Беларусь, у Траццякоўскай галерэі, фондах Беларускага саюза мастакоў, Міністэрства культуры Рэспублікі Беларусь, Нацыянальным Полацкім гісторыка-культурным музеі-запаведніку, у музеях, галерэях і прыватных калекцыях у Беларусі і за мяжой.
