Імя Сямёна Уладзіміравіча Дамарада добра вядомае знатакам выяўленчага мастацтва як у Беларусі, так і за яе межамі. За гады сваёй творчай дзейнасці мастак працаваў у самых розных тэхніках і жанрах: манументальным роспісе, мазаіцы, акварэлі. У апошнія дваццаць гадоў Сямён Уладзіміравіч займаецца пейзажным жывапісам. Пейзажы Дамарада выкананыя ў рэалістычнай манеры, але пры гэтым складаныя па вобразнай сістэме, надзвычай рамантычныя і паэтычныя паводле настрою. Колеры мяккія, някідкія, без рэзкіх кантрастаў, але пры гэтым творы вельмі насычаныя эмацыйна, поўныя святла і паветра. Дамарад — мастак імпрэсіяністычнага светаадчування, які імкнецца ўлавіць уражанне ад імгнення, якое адыходзіць. Таму на яго палотнах часта прадстаўленыя пераходныя станы прыроды — вясна і восень, вечар і раніца, — калі яе зменлівасць праяўляецца асабліва інтэнсіўна. Асабліва прыцягваюць увагу мастака віды роднай Бабруйшчыны, а таксама Нарачанскага краю.
Семён Уладзіміравіч Дамарад нарадзіўся 2 кастрычніка 1948 года ў Бабруйску ў сям’і вядомага мастака-графіка Уладзіміра Аляксандравіча Дамарада. Скончыў Мінскае мастацкае вучылішча імя А. К. Глебава (1968), і Беларускі дзяржаўны тэатральна-мастацкі інстытут (1976). Удзельнічае ў выставах з 1972 г. Персанальныя выставы праходзілі ў Беларусі, Германіі, Аўстрыі. Член Беларускага саюза мастакоў з 1985 г. Лаўрэат прэміі Федэрацыі прафсаюзаў Беларусі (2011).
Творы С. У. Дамарада знаходзяцца ў Нацыянальным мастацкім музеі Рэспублікі Беларусь, Нацыянальным центры сучасных мастацтваў Рэспублікі Беларусь, іншых музеях нашай краіны, а таксама ў прыватных зборах Беларусі і іншых краін.
Выстава працуе па 24 лістапада 2024 года.
Куратар выставы — Корзун Франц Валер’евіч, навуковы супрацоўнік выставачнага аддзела Нацыянальнага мастацкага музея Рэспублікі Беларусь.
