У гэтым годзе ўручэнне дыпломаў выпускнікам Мінскага дзяржаўнага мастацкага каледжа імя А. К. Глебава – жывапісцам, скульптарам, дызайнерам, мастакам дэкаратыўна-прыкладнога мастацтва традыцыйна адзначыцца ўрачыстым мерапрыемствам у сценах Нацыянальнага мастацкага музея Рэспублікі Беларусь.
У цырымоніі таксама прымуць удзел зоркі Беларускай дзяржаўнай філармоніі і Вялікага тэатра Беларусі, спецыялісты вядучых музеяў і мастацкіх галерэй.
Усе дыпломныя праекты, выкананыя ў самых розных відах выяўленчага мастацтва, аб’ядноўвае нязменна высокі ўзровень прафесійнай падрыхтоўкі ў спалучэнні з захаваннем найлепшых традыцый беларускай нацыянальнай выяўленчай школы. Кожная работа, прадстаўленая на выставе, дэманструе ўнікальны талент і індывідуальны стыль маладога мастака. Разнастайнасць сюжэтаў сведчыць аб шырокім спектры інтарэсаў аўтараў.
Безумоўна, выстава будзе цікавая не толькі тым, чыё творчае жыццё звязана са знакамітай «Глебаўкай», але таксама ўсім, хто цікавіцца будучыняй беларускага выяўленчага мастацтва.
Выстава працуе па 12 ліпеня 2024 года.
Куратары выстаўкі – Зуева Дарына Халедаўна і Крывецкая Лізавета Сяргееўна, малодшыя навуковыя супрацоўнікі выставачнага аддзела Нацыянальнага мастацкага музея Рэспублікі Беларусь.
