Наватар і традыцыяналіст, ледзь ці не адзіны прадстаўнік скульптурнага супрэматызму, член вядомага авангарднага аб’яднання “УНОВИС” Давід Якерсон – яшчэ адзін яркі прадстаўнік Віцебскай мастацкай школы, творчасць якога ва ўсёй паўнаце будзе прадстаўлена ў залах мастацкага музея.
Калекцыя творчых работ Якерсона, што захоўваецца ў зборы Віцебскага абласнога краязнаўчага музея, – сапраўды ўнікальная з’ява асабліва на фоне ўсіх вялікіх страт нашых мастацкіх каштоўнасцей першай паловы ХХ стагоддзя. На экспазіцыі, якая носіць рэтраспектыўны характар і ахоплівае практычна ўвесь творчы шлях майстра, будуць паказаны больш за 100 графічных работ і скульптур, а таксама архіўныя фотаздымкі.Гэта дасць магчымасць ацаніць усю разнастайнасць скульптара і графіка, мастацтва якога не ўкладаецца ў рамкі аднаго творчага метаду.
Тут і арнаментальныя кампазіцыі ў стылістыцы “ар-нуво”, і эксперыменты ў духу кубізму і экспрэсіянізму, і пленэрныя гарадскія замалёўкі Віцебска, і наватарскія супрэматычныя творы 1920-х гг., і ў той жа час фігурная скульптура 1930-х гг., якая прадстаўляе выявы “некананічнай прыгажосці” асоб іншых рас.
Стылёвая разнастайнасць работ скульптара і графіка пераканаўчапацвярджае не толькі эвалюцыю светапогляду самога майстра, але і бурныя ідэалагічныя і мастацкія перамены, якія адбываліся ў мастацтве першай паловы XX стагоддзя. Яго творчасць, як і яго жыццё, – гэта люстэрка часу.
