Экспазіцыя размесціцца на першым паверсе галоўнага корпуса музея і аб’яднае калекцыі Нацыянальнага мастацкага музея, “Галерэі ХО” і прыватных калекцый. Яна будзе ахопліваць творы розных відаў мастацтва як беларускіх майстроў старэйшага пакалення Ф. Бараноўскага, Л. Дударэнкі, І. Уласава, Б. Казакова, А. Волкава і інш., так і сучасных мастакоў – Т. Радзівілкі, В. Альшэўскага, Т. Кандраценкі, К. Хлопава.
Спорт у мастацтве – тэма вечная і непазбыўная. З часоў антычнасці традыцыі сумленных спартыўных спаборніцтваў па непарушных правілах, культ дасканалага, фізічна развітога цела былі прадметам інтарэсаў мастакоў. Адроджаная ў пачатку ХХ стагоддзя спартыўная тэматыка актуальная і ў сучасным мастацтве. Выстава прапануе гледачу прасачыць шырокую поліфанію эмоцый спартыўных спаборніцтваў: цяжкасць і драматызм барацьбы і моманты чыстых перамог, эмацыянальныя выбухі захаплення ў радасным натоўпе стадыёна і захапляльныя моманты матчаў і трэніровак, дзяцей і падлеткаў і камандны дух масавых спаборніцтваў, імклівасць і энергію спорту, выяўленыху сімвалічных кампазіцыях.
Выставачны праект “Гульні. Игры. Games” – гэта своеасаблівае прывітанне II Еўрапейскім гульням. Ён сведчыць аб вечным духу вялікай гульні – ад першых дзіцячых гульняў да эмацыянальнай насычанасці прафесійнага паядынку. Бо імкненне перамагчы або быць пераможцам закладзена ў нас першапачаткова.
