Прафесійную адукацыю Ядвіга Раздзялоўская атрымлівала ў Акадэміі прыгожых мастацтваў у Варшаве, Свабоднай школе жывапісу і малюнка Людовікі Мехофер (жонкі брата Юзафа Мехофера, вядомага польскага мастака) у Любліне і Школе выяўленчых мастацтваў Бланкі Мерсер у Варшаве.
Другая сусветная вайна прывяла Ядзвігу Раздзялоўскую ў Беларусь, якая стала яе другой радзімай.
Тут яна жыла спачатку ў Баранавічах, потым у Маладзечне. Менавіта ў гэтым горадзе Ядвіга Іосіфаўна адыграла выключна важную ролю ў станаўленні маладзечанскага мастацкага кола: у другой палове 1950-х гг. разам з Канстанцінам Харашэвічам заснавала народную студыю выяўленчага і дэкаратыўна-прыкладнога мастацтва, у якой выкладала кампазіцыю. У 1948 годзе ўступіла ў Саюз мастакоў БССР. Вяла вельмі актыўную выставачную дзейнасць на тэрыторыі Беларусі і за мяжой. Была ўзнагароджана Ганаровай граматай Вярхоўнага Савета БССР, а ў Польшчы ёй прысвоілі званне “Заслужаны дзеяч культуры Польшчы”. Цяпер творы Ядвігі Іосіфаўны захоўваюцца ў Нацыянальным мастацкім музеі Рэспублікі Беларусь, музеі ў Замосці (Польшча), Мінскім абласным краязнаўчым музеі ў Маладзечне, Баранавіцкім краязнаўчым музеі, фондах Беларускага саюза мастакоў, прыватных калекцыях.
Спадчына Раздзялоўскай разнастайная ў жанравых адносінах: тэматычная карціна, пейзаж, інтэр’ер, партрэт, нацюрморт.
У апошнім мастачка раскрыла сябе па-сапраўднаму ярка і ўсебакова. Дэкаратыўнасць, трапяткая, зменлівая лінія малюнка, дакладны контур, мяккі каларыт, выразна прадуманае кампазіцыйнае рашэнне – асноўныя рысы, уласцівыя яе працам у жанры нацюрморта. Тонка адчуваючы тон, колер, лінію, фактуру, мастачка перадае прыгажосць жывой рэальнасці. Прасякнутыя то яснымі, то невыразнымі, але заўсёды праўдзіва паэтычнымі, а таму пераконваючымі адчуваннямі, яе нацюрморты, напоўненыя ўнутранай гармоніяй, маюць тыя рысы, якія дапамагаюць гледачу адчуць, усвядоміць “штодзённасці чароўнае імгненне”.
Куратар выставы – Наталля Буракоўская, навуковы супрацоўнік навукова-фондавага аддзела
Работа выставы працягнецца
да 20 чэрвеня 2022 года
