Дзень Перамогі ‒ даніна памяці і глыбокай павагі ўсім удзельнікам Вялікай Айчыннай вайны, якія сталі на абарону Радзімы. 8 мая (9 мая па маскоўскім часе) 1945 года ў Германіі быў падпісаны акт аб безумоўнай капітуляцыі германскіх войскаў, які паклаў канец адной з самых страшных войн у гісторыі чалавецтва.
Тэма вайны стала адной з вядучых і ў творчасці беларускіх
мастакоў-франтавікоў, і тых майстроў, чыё дзяцінства выпала на ваенныя гады. Май Вольфавіч Данцыг, які ў 11 гадоў літаральна цудам эвакуіраваўся з сям’ёй з акупіраванага Мінска ў далёкі Ульянаўск, пасля неаднаразова звяртаўся да тэмы вайны ў сваіх творах. Ён увасабляў яе праз розныя вобразы, не звяртаючыся да адлюстравання сцэн бою, пісаў “без адзінага выстралу”.
Палатно М.В. Данцыга “Вечны агонь” выклікае складаныя эмоцыі. З аднаго боку, яно напоўнена радасным напамінам аб доўгачаканай Вялікай Перамозе. І ў той жа час карціна з’яўляецца сведчаннем таго вялізнага ўкладу, які быў унесены коштам мільёнаў жыццяў савецкага народа ў барацьбе за магчымасць мірнага існавання будучых пакаленняў. Яркія языкі полымя і жывыя кветкі, ускладзеныя ля падножжа манумента-абеліска ў гонар перамогі ў Вялікай Айчыннай вайне і ў памяць аб воінах Савецкай арміі, партызанах і падпольшчыках, становяцца сімвалам працягу новага мірнага жыцця.
Выстава пройдзе з 7 па 26 мая 2025 г. у прыбудове да галоўнага корпуса музея.
