Месячная ноч. Здраўнёва - Нацыянальны Мастацкі Музей Рэспублікі Беларусь

У 1892 годзе мастак Ілья Рэпін набыў маёнтак Здраўнёва ў Віцебскай губерні. Там, у гэтым маляўнічым месцы, на беразе Заходняй Дзвіны, амаль дзесяць гадоў запар сям’я Рэпіна праводзіла летнія месяцы, адпачываючы на ўлонні прыроды ад мітусні сталічнага жыцця. Там жа былі створаны некаторыя вядомыя працы майстра, у тым ліку і карціна “Месячная ноч. Здраўнёва”.

Гэта палатно – рэдкі ў творчасці Рэпіна рамантычны вобраз. Малюючы сваю дачку Надзею і любімага сабаку Пегаса на начным шпацыры, мастак імкнецца стварыць настрой таямнічасці і летуценнасці. Зачаравана гледзячы на мігценне месячнай дарожкі на цёмнай вадзе, дзяўчына, стоячы да нас спіной, цалкам пагрузілася ў свае перажыванні. На нейкае імгненне ўзнікае адчуванне, што перад намі прыгожая незнаёмка, чый унутраны свет і характар цалкам ад усіх утоены.