Нацюрморт з дынямі і гарбузамі - Нацыянальны Мастацкі Музей Рэспублікі Беларусь

Ілья Машкоў не быў прыхільнікам мастацтва мінулага. Незадаволенасць “змрочнай” эпохай, як называлі яе сучаснікі, выяўлялася ў непрыманні ўсяго таямнічага і недаказанага. Пэндзлем мастака кіруе паўнакроўнае адчуванне рэальнай прыгажосці прадметнага свету, любоў да багацця пладоў зямлі. Матэрыяльную прыроду намаляванага выяўляе сакавітая жывапісная лепка прадметаў. Ураўнаважаная кампазіцыя выбудоўваецца з круглявых аб’ёмаў рознай велічыні: кавуна, дыні, гарбуза, яблыкаў, сліў, вінаграду.

Машкоў нібы спаборнічае з рэкламнай шыльдай. Яркасць і гучнасць фарбаў, паўнаважкасць формаў, знарочыстая прадметнасць адлюстраванага, падвышаная экспрэсія надаюць працы адценне дэманстратыўнасці.

Нацюрморт больш, чым які-небудзь іншы жанр, выслізгвае ад слоўных апісанняў: трэба ўважліва прыгледзецца, пагрузіцца ў яго. Ён вучыць спасцігаць уласна жывапіс – любавацца выявай, яе прыгажосцю, сілай і глыбінёй.