Партрэт Варвары Яршовай з дачкой - Нацыянальны Мастацкі Музей Рэспублікі Беларусь

Большую частку свайго жыцця (да 43 гадоў) Васіль Трапінін заставаўся прыгонным графа Моркава. Ён доўга жыў з сям’ёй графа ва Украіне і, толькі атрымаўшы доўгачаканую вольную, змог канчаткова асталявацца ў Маскве.

“Партрэт Варвары Яршовай з дачкой” – адзін з найлепшых твораў мастака ў зборы Нацыянальнага мастацкага музея. Трапінін, як правіла, аддаваў перавагу паказу сваіх персанажаў у нязмушанай хатняй абстаноўцы, падкрэсліваючы натуральнасць іх паводзін, выяўляючы пачуцці прыхільнасці і сімпатыі ў зносінах адзін з адным і з гледачом. У пэўнай ступені ў гэтым знаходзіла сваё адлюстраванне агульная атмасфера купецкай Масквы таго часу, з яе павольным патрыярхальным укладам жыцця, гасціннасцю і куды большай свабодай прыватнага існавання, чым у афіцыйным Пецярбургу.

Васіля Трапініна справядліва лічаць майстрам дзіцячага партрэта. Заўсёды шчыра любуючыся дзіцем, ён, як ніхто з сучаснікаў, умеў перадаць усю своеасаблівасць яго знешняга аблічча і ўнутранага свету.