Бярозавы гай - Нацыянальны Мастацкі Музей Рэспублікі Беларусь

Архіп Куінджы адрозніваўся яркай мастацкай індывідуальнасцю. Ён бачыў прыроду па-свойму. У напружанасці колеру, у перадачы эфектаў асвятлення ён не ведаў сабе роўных.

Не выпадкова адным з упадабаных матываў пейзажыста стаў бярозавы гай, асветлены прамянямі сонца. Жадаючы ўзмацніць гучнасць святла і падкрэсліць глыбіню прасторы, Куінджы звяртаецца да складанага кампазіцыйнага рашэння. Пагружаныя ў густы цень ствалы бяроз і іх кроны, размешчаныя на першым плане карціны, утвараюць нешта накшталт аркі, у праёме якой адкрываецца невялікая прастора ў зіхатлівым святле. Выкарыстоўваючы абагульненую, некалькі дэкаратыўную трактоўку формаў, моцныя кантрасты святла і ценю, мастак стварыў надзіўва яркі вобраз сонечнай раніцы.