Смерць Адоніса - Нацыянальны Мастацкі Музей Рэспублікі Беларусь

У 1757 годзе ў Пецярбургу адкрылася Акадэмія трох самых знакамітых мастацтваў – першая ў Расіі навучальная ўстанова, дзе рыхтавалі архітэктараў, жывапісцаў, скульптараў і гравёраў. Сістэма адукацыі Акадэміі будавалася па ўзору замежных акадэмій, якія высока шанавалі пастулаты класіцызму, адным з якіх з’яўлялася перайманне Антычнасці, г. зн. майстрам Старажытнай Грэцыі і Рыма.

Адзін з першых выпускнікоў Пецярбургскай Акадэміі – жывапісец Антон Ласенка. Як найлепшы з вучняў ён быў адпраўлены ў Парыж для ўдасканалення свайго майстэрства. Менавіта там маладым мастаком была напісана карціна “Смерць Адоніса” – адна з ранніх работ майстра. У яе аснове – антычны міф, які апавядае каханне багіні Венеры і зямнога юнака Адоніса. Падчас палявання Адоніс быў смяротна паранены, а бессмяротная Венера не змагла выратаваць свайго каханага.

У гэтай працы пазнаецца агульны кірунак творчасці жывапісца, які стаў адным з самых паслядоўных прыхільнікаў класіцызму ў рускім мастацтве. Нягледзячы на тонкую нюансоўку каларыту, уласцівую французскаму ракако, у творы чытаецца ўраўнаважаная кампазіцыя, скульптурнасць форм і выразны малюнак.